Me piasarìa fermarme par strada
e voltarme indrìo de boto.
Come par cagnar el tempo andà.
Restarìa, forsi, a boca verta
nell’acorsarme de quei che,
gatoni, i me caminava drìo.
I me stava col fià sul col
sensa che mì sentisse
gnanca un s-ciantin d’arfiada
o un qualche pestesar.
Vegnudi fora da cissà indoe,
i riconossaria tuti e,
a tuti, vorìa dar un strucco
con el magon dentro
che me incioda el moarme
e me impastela la lengua.
Lori, i amici dela maraja,
i buteloti de ‘na olta,
i me guardarìa sganassando
e ciamandome come alora,
Caio e no Claudio…
E come mi i vedarìa zoini
e non tormentadi da afani,
anca lori i me sghimarìa
trovandome, sensa smaraveja,
ala stessa maniera de ani fa.
Forsi con l’ilusion d’aver ciucià
l’aqua dela giovinessa,
forsi parchè un pochetin Peter Pan,
forsi con le fete de bondola
sui oci par non capir
che i ani i ghè…
E non se pol scondarli
o far finta che non i ghe sia.
Lasso ale spale la me vecia maraja,
quei che me son inventà
ma che i campa nel me cor,
con boresso mai desmentegà.
E togo ancora la me via
lassandome indrìo tanta malinconia.

di Claudio Beccalossi
_____

La poesia “La me vecia maraja” si è classificata tra le finaliste della sezione delle poesie a tema libero in dialetto del Premio Nazionale di Letteratura e Poesia “Vincenzo Licata – Città di Sciacca”, Edizione 2009.