Eranu jorna di carnarivali,
di fastu e culura scunzacrava
ogni vanedda,
e pittiddi nt’agnuna siculara,
nghirlandavanu nta filinii
di lu tempu,
accanzannu smannu d’esistenza
nta occhi viviruti e fistanti
di picciriddi e granni.
“Facci arripudduti” supra facci,
cunzignavanu gioventù a vecchi
e vita a scheletri e mostri
nt’abballi macabri, musicati;
sutta la nivura mascara di ‘ncelu,
ciavuru di mennula e carameli,
asciluccavanu l’aria, ch’abbagnavanu.
Ma addabbanna dunni smunta lu paisi,
nta na fridda trazzera, cusuta d’umbri,
sbrizzi d’ucchiati di luna
arriscirìanu l’ultimi parpiti
di na vita sbinnuta,
accalata sulu a lu distinu
d’appattari cu lu sangu ddi vuci
chi sintìa scaccaniari la so vriogna,
e lu leccu ci appettavanu li munti.
E allascava di suspiri, lu cori,
“nta dda notti funna e scurusa”,
e la vuci lamintusa, stramazzava,
comu muzzicuna a chiai di silenzi,
chi lu ciusciu di lu ventu picuniava,
ora cu un lentu stravuliari a lu sò civu
di muti pittiddi di chiantu.
Dumani l’arbarìa, macari,
s’arrifardassi di sdari l’affacciata,
p’un cerniri dd’arma ‘ndammusata,
nta du’ occhi di vitru abbutati,
“nta ddi jorna di carnari vali” …
di Pietro Renna (Castellammare del Golfo, TP)
___
“Eranu jorna di carnarivali …” si e’ classificata al primo posto della Sezione B delle poesie in vernacolo a tema libero dell’Edizione 2011 del Premio con la seguente motivazione:
“LIRICA DI PROFONDA INTENSITA’ EMOTIVA. STRUTTURA COMPOSITA ESSENZIALE ED EQUILIBRATA. SCELTA DELL’ESPRESSIONE PURA DIALETTALE QUALE OPPORTUNITA’ DI SPAZIARE FRA REGISTRI ESPRESSIVI PIU’ VASTI ED EFFICACI. UN RECUPERO PREZIOSO NELLA MEMORIA DELLA NOSTRA LINGUA-DIALETTO PER CONFERIRE UN’IMPRONTA DI ORIGINALITA’ E DI EFFICACE MUSICALITA’ DI ESPRESSIONE. LA POESIA SI E’ DISTINTA ANCHE PER LA TEMATICA ESPOSTA: L’ALLEGRIA ED I FRASTUONI FESTAIOLI CARNASCIALESCHI CONTRAPPOSTI AL SIMULTANEO DRAMMA UMANO CHE SI CONSUMA AI MARGINI DEL PAESE, METAFORA DELLA VITA OVE GIOIA E DOLORE SI INCROCIANO, SEGNANDO, CON INSPIEGABILE FATALITA’, IL PASSO DELLA NOSTRA ESISTENZA.”
La Segreteria del Premio
Pietro Renna (al centro) durante la premiazione
