Lu tempu di la simina

Ia ca un sugnu cchiù na lu tempu di la simina
e li me vrazza un’annacanu nutrichi.
Ia ca canusciu lu munnu e li so’affanni
e di la vita la trama di la tila
sacciu quannu l’amuri po’ esseri sognu
o puramenti addivintari malignu.

Ia ca mi taliu na lu specchiu
quannu la me facci è stracca
cuntu li me jorna e li turmenta,
ammucciati na li pieghi di la peddi
e l’accarizzu comu accarizzu li me figghi,
ia na la vesti vecchia e sculurata
ci appizzu primavera e virdi fogghi

Ia ca li saccenti, li preputenti e li scarti virriniusi
ca si cridunu d’esseri granni e valurusi
l’haiu cumbattutu cu l’armi di lu me credu
e di lu me pinseru
c’apparteni a tutti li genti semplici e sinceri
ca na l’onestà e na la chiarizza
tennu lu valuri di la so’grannizza.

Ia ca arricogghiu carta strazza e ci scrivu li me pinseri
pi falli nesciri di la me jargia
lassu ca passanu, lassu ca vannu
nun l’assicutu, nun li trattegnu
picchi li pinseri apparteninu a lu munnu.

Ia ca cu la vesti niura
un vosi vestiri lu me duluri
lu cummigghiaiu cu culura accisi
pì sfidari la mala sorti
e la lama fridda di la morti.

Ia ca la storia di me patri
e di tutti chiddi ca mi vulianu beni
ca di lu me arburu eranu li rami
la canusciu è nun la scuordu

picchì idda nun piega la me schina e la me testa
‘nfrunti a li malfatturi mascharati
e a li putenti ‘nbillittati
di sta terra bedda, di lu suli vasata
e di li guvirnanti arrusicata.

Ia vulissi turnari ancora na la me terra virdi e gialla
‘ncapu na naca nta l’anticu arburu appizzata
unni picciridda araciu araciu m’annacava.
Vulissi ascutari ancora lu cantu di lu ventu
ca m’assicutava, mentri satava na la terra tratturata
e sciugghia li nastri azzurri di li me’ capiddi.
Cogghiri li cirasi, li mori, li sorbi e l’azzalori
li spighi e li grappuli di racina appizzati nta la prieula
e rispirari tutti li ciuri di la me campagna
pì sentiri l’arcanu di la zagara, di lu gelsuminu
e lu ciauru aspru e duci di lu garofano majulinu.

Vulissi abbrivirari la me vucca
cu lu latti jancu di la me ‘nnuccenza
e liccari la schiuma cu la lingua
carizzannu la vacca ca si chiamava Bedda.
Vulissi cuntari li stiddi a una a una
prima d’addummiscimi curcata na la terra
supra la cutra di pezza di me nonna.

Ia lu sacciu ca chistu è sulamenti un sognu
ma suonnu picchì vogghiu sunnari
un vogghiu arrennimi a lu pinseru
ca la me’ terra è addivintata russa e sicca
senza cchiù acqua ca la dissita né simina ca la nutrica.

Lu sacciu ca la me’ esistenza è junta
na la strata vacanti di l’attisa
unni l’arma è stanca e arrinnuta.
Ca sugnu na lu tempu unni
cogghiu li frutti di lu me’ distinu
di chiddu chi sappi siminari, metiri e liari.
Lu sacciu..lu sacciu
ma vulissi sentiri li suspiri e li silenzi
ca ammuccianu li rimpianti
e circari na lu misteru di la luna – quannu mi parra-

tutti li segreti ca dispittusa cuntari un mi vosi
Vulissi ancora la spiranza di lu luccichiu di la brina
e la ‘nnucenza di la rosa diamantina
E prima ca la me terra avi addivintari grigia
vulissi lassari lu me’ nomi scurciatu
na l’arburu di la naca ca annacava
tutti li me sogni e cu lu me distinu li ‘ntrizzava.

Ia ca un sugnu cchiù na lu tempu di la simina
vulissi ittari l’ultima simenza na sta terra arsa
di lu cielu biniditta e di l’anticu mali marturiata
vulissi annacari li so figghi
ca ormai granni e disillusi un vonnu cchiù arristari

ci vulissi regalari tanticchia di la me’ tistarda spiranza
na sta matri terra e na la Vita!

di Francesca Albergamo (Alia, PA)
___

“Lu tempu di la simina” si e’ classificata al terzo posto della Sezione B delle poesie in vernacolo a tema libero dell’Edizione 2011 del Premio.

Francesca Albergamo (al centro) durante la premiazione

 

spacer

Leave a reply