Lu pagliacciu

Chi ni sapiti viatri d’un pagliacciu,
di la so vita e chiddu chi à subìtu?!
Pinzati, lu so cori chi è di ghiacciu
e sapi fari sulu ‘u scimunitu?

Viditi sulamenti la facciàta,
lu so surrisu sempri disignatu;
l’ammùccia cu dda màschira pittata
soccu è chi prova e chiddu chi à passatu.

Regala lu surrisu a tutti quanti
e puru si lu cori ci fa mali
abballa, canta, ridi e nta dd’istanti
cumanna la so vita surriali.

Ma quannu chi la sira poi finisci
di fari lu spittàculu a la fera,
ddu truccu di la facci spirisci
e torna a la so vita, chidda vera.

Nta lu tiatru, chiddu di la vita,
pi un attimu addiventa spittaturi,
ddà ‘n menzu la so facci è ‘a chiù pulita
e l’autri genti ‘nveci su’ l’atturi.

Taliànnuli li squadra ad una ad una
soccu è chi fannu tutti chiddi facci;
si senti sulu, chiancu e si n’adduna
chi fora ci su’ ‘n saccu di pagliacci.

di Giuseppe Gerbino
_____

La poesia “Lu pagliacciu” si è classificata tra le finaliste della sezione delle poesie a tema libero in dialetto del Premio Nazionale di Letteratura e Poesia “Vincenzo Licata – Città di Sciacca”, Edizione 2009.

spacer

Leave a reply