SCIACCA

T’amu pirchì si bedda, Sciacca mia,
pi ssa luci chi manna lu to’ mari.
pirchì mi rigalasti la puisia
ccu lu travaghiu di sti marinari.

T’amu, pirchì mi basta ssu tramuntu
pi farimi ‘n-artista divintari,
pirchì lu to’ passatu è com’un cuntu
d’omini illustri e di ricordi cari.

T’amu pi la to’ genti rispittusa
ch’avi l’anima sempri arrifriscata
di sta nostra marina purtintusa
sempri d’un suli d’oru illuminata.

A guardariti anticchia di stu mari
pari chi scinni Tu di la vaddata
pirchì tuttu st’azzurru vo’ abbrazzari
pi daricci, di cori, na vasata.

T’amu pirchì lu “munti” toi nfatatu
ti fa curuna, o terra mia divina,
Lu “munti”, dunni vighia ‘n-granni fatu
natu e crisciutu dintra sta marina.

T’amu pi li carizzi chi m’hai datu
quannu, nicuzzu, ntra li to’ vaneddi,
lassavi lu me’ côri spinsiratu
e la nnuccenza di sti vavareddi.

Si quarchi vota Tu mi sì cuntraria
pirchì di certi cosi nun t’adduni,
ssi to’… tintizzi mannu tutti all’aria
pi sti versi amurusi chi mi duni.

Pirchì davanti a Tia mi sentu nicu
comu nicu mi sentu ccu la mamma.
Sciacca, paisi beddu, eterna fiamma,
ti salutu, t’abbrazzu e binidicu.

_____

Torna all’indice delle poesie………………..Torna all’indice della sezione dedicata a V. Licata

Leave a reply