Aspettu ‘a primavera
e lu so pallidu suli,
aspettu ddu raggiu
ca illumina ‘a terra
vagnata di lu sirenu,

aspettu di li rami nuri
spuntari tenniri fogghi
e di li gemmi lu rosa
di li persichi villutati

aspettu ca l’aria
profumi d’aranci,
e havi inziu
‘a danza fistusa
di li rinnini,
e di lu mari m’aspettu
ducizza e accugghienza,
la rina morbida
accumpagnari li me passi

aspettu ca versu sira
u suli si cala
darreri ‘a muntagna,
raccamannu nto celu
sciabuli russi di focu

aspettu ca magica
s’addumi la vita
e li farfalli liggeri
purtari a lu me cori,
ca trepidu spera,
arcubalena d’amuri.

di Teresa Riccobono
_____

La poesia “Aspettu ‘a primavera” si è classificata tra le finaliste della sezione delle poesie a tema libero in dialetto del Premio Nazionale di Letteratura e Poesia “Vincenzo Licata – Città di Sciacca”, Edizione 2009.