Autri tempi

Nti n’agnuneddu
di lu sutta scala
un jornu vaiu a trovu
na cartuzza

A la graputa
cu surprisa viu
na pampina d’ulivu
sicca e scura

Na scritta si vidìa
a mala ppena
acchicchiu leggiu
la parola: t’amu

Dda scritta c’un
chiuviddu era marcata
lu tempu nun la
potti cancillari

Turnaru a la menti
ddi mumenti
ricordi di quann’era
nicareddu

Lu primu amuri
a lampu pinzavu
quannu l’amuri
si facìa cu ll’occhi

quannu si sunnava
a occhi aperti
e si spinnava
pi na vasatedda

Era tempu ca
la donna cuntava
comu na Dea
pi tutti valìa

Ncapu n’artaru
era appuiata
era di l’omu
quasi adurata

Comu canciaru
li tempi presenti
la fimmina na cosa
divintata

lu corpu si svinni
cu arruganza
senza russuri
e senza crianza

Li grana sunnu
l’unicu valuri
la murali nunn’avi
cchiù sintùri.
_____
di Lillo Firetto

La poesia “Autri tempi” si è classificata come finalista nella sezione poesie a tema libero in dialetto del Premio Nazionale di Letteratura e Poesia “Vincenzo Licata – Città di Sciacca” – Edizione 2010

spacer

Leave a reply