Picciliddu jera
e tu u gianti.
Assittatu ‘ncapu u carrettu,
tascu ‘ntesta
zzotta nni li manu
e sicaretta ‘mmucca.
Manu raspusi,
chini di caddi
vita di stenti,
fatica tanta.
Tanti i figghi,
unu darrì l’antru
ma u destinu vonzi
figghi emigranti.
Sulu ristasti
ccu li to affanni,
sulu ristasti
cu lu cacanidu.
Aspitti u callu,
timpu di ferii,
ci risti ladiu
si nun punu scinniri.
Sorti scillarata
ti fu cumpagna,
sorti scillarata
ppi a to cumpagna.
Vita di stenti,
fatica tanta,
vita d’aspittari,
vita finuta.
_____
di Giuseppe Bellanca
La poesia “Na vita” si è classificata come finalista nella sezione poesie a tema libero in dialetto del Premio Nazionale di Letteratura e Poesia “Vincenzo Licata – Città di Sciacca” – Edizione 2010.
