E ti nni vai cu lu burka pi li strati di Kandahare chianci pi li to fimmineddi
senza alligria di cori
e talìi picciliddi scavusi
ca sunnu omini senza futuru.
E ti nni vai a Baghdad, chiamata terra di la paci,
e viri to figghiu mbuttitu di esplosivu
ca spargi sangu nnuccenti
e fa a pezzi li so stessi carni
ca tu matri cu amuri nutricasti.
E ti nni vai nna li villaggi africani a purtari
quartari d’acqua in testa
e lu pettu siccu di latti
pi li to figghi cu la facci di vecchi,
li pèanzuddi vunci
e sai ca nun hai la forza di livari
la granni arsura di la to terra.
E ti nni vai davanti la scola di Beslan
unni omini e fimmini senza cori,
da li visciri friddi,
portanu tirruri e morti
a nnuccenti e picciriddi.
E ti nni vai pi li nostri strati a chianciri
la carnificina di lu sabatu notti,
li to figghi ammazzati di la mafia
e chiddi ca s’accattano la morti cu la droga.
E ti nni vai matri di duluri a priari
sutta la cruci di sti criaturi,
ca sunnu li novi cristi,
pi arrimuddari li cori di l’omini lupu
ca sparginu sangu e morti
e astutanu lu futuru di la vita.
_____
di Emanuele Insinna
La poesia “E ti nni vai matri di duluri” si è classificata come finalista nella sezione poesie a tema libero in dialetto del Premio Nazionale di Letteratura e Poesia “Vincenzo Licata – Città di Sciacca” – Edizione 2010
