A milli a milli,s’assicutanu currennu
cu li crinera a lu vento scumazzannu
scippannu l’alica n’funnu e poi rumpennu
nta la riva nnuccenti raggia e chiantu
mentri la scuma purtata di lu ventu
avi sapuri d’odiu e di rimpiantu
e di sali di lacrimi e spaventu
quannu senti ddu tronu, chi criscennu
di la testa a lu stomacu passannu
pi la ula si perdi n’tun lamentu
e po’ ripigghia, e si vuncia comu un cantu
di morti, di minnitta e di turmentu.
Trema la terra, trema la gran rocca
e trema tutta stritta e arriparata
di li vrazza piatusi di lu portu
la nostra flotta comu nna cuvata
sutta l’ali piatusi di la ciocca
mentri lu mari rumpi e sinn’acchiana
supra li scogghi , supra li casciati
a scavacari ddu vrazzu chi arripara
li piscareggi stritti, mpirtusati…….
poi tuttu nzemmula,
propriu n’tun mumentu,
lu ventu cala comu magaria
e si ferma lu tempu
e poi firria
araciu araciu a punenti e picchiulia.
Ora fa chioviri rina russa e fangu
chi scurri araciu araciu comu sangu
n’ta la me facci, li machini, li strati…
e libira lu cori, comu un chiantu
chi nesci senza forza ne valìa,
comu un chiantu d’addevu, cu la ngutta,
un chiantu chi cunsola e chi cunutta
e nni fa arrenniri, nni fa abbannunari
a stu distinu, comu fa lu mari.
La poesia “Sciroccu” ha partecipato all’edizione 2014 del Premio Letterario “Vincenzo Licata – Città di Sciacca”, classificandosi al PRIMO POSTO della sezione “Poesia a tema libero in Vernacolo”.
