S’annàca, un bastimèntu
a cèntru di lu pòrtu
tinènnu cunfortu
‘nta ‘nna cima a ‘ppùppa
Si vivi, l’onda,
la stappa di cumèntu.
S’appòia a lu sartiami,
lu stàncu palamèntu.
Sùrgi un lamèntu
di ‘nna còsta di fasciami
o, forsi, è
un càntu di malincunìa.
Puntànnu a la tistàta,
rìttu, a proravìa
pari vulissi
circàri lu vèntu
pàrtiri, ancóra
‘pi l’antica via.
S’addùma, lu faru
e po’ s’astuta,
pari chi lu babbìa
e lu saluta.
Scjnni ‘nna làrma
di ‘nn’occhiu di cubbìa,
è ‘nna catìna
chi lu tèni fèrmu,
méntri s’annàca
a cèntru di l u pòrtu.
Giovanni Lo Coco
Altofonte (Pa)
La poesia “Vecchiu bastimèntu” ha partecipato all’ edizione 2015 del Premio Letterario “Vincenzo Licata – Città di Sciacca”, classificandosi al PRIMO POSTO della sezione “Poesia a tema libero in Vernacolo”.