Nna li notti sereni

Nna li notti sereni d’estati,
li stiddi
a migghiara e migghiara
sbrinnulìanu
nna lu celu
senza fini turchinu;
a la stisa
zurrichìanu li griddi a la campìa,
e lu cantu
longu e priziusu
d’un rusignolu,
raccamatu di passioni e d’amuri,
patrunìa lu me cori;
l’unni
‘ncutti ‘ncutti s’assicùtanu,
spicchulìanu
sutta la luna bianca
e arcani cunfirenzi murmurìanu.
Si rispira un’aria chi risciala,
ciavurusa di terra e di mari.
Mi sentu a ‘ddi mumenti supraniari
di la ducizza di ‘dda sinfunia
e di l’immensu e sfrazzusu scinariu,
chi mi ‘nciammanu sensi e fantasia.
Pi mia,
‘sti gran tisori!
Suvècchiu era, pi mia,
‘na cannilicchia
di picuraru,
lu gridìu d’un griddu,
du’ nuticeddi tantu pi cantari,
l’oduri d’un ciuriddu,
‘na sbrizza sula di mari,
‘na pinziddata d’azzolu.
E inveci, talìa ccà:
lu tuttu di lu tuttu,
di ‘sti ricchizzi a jèttitu,
è pi mia,
pi ‘stu vermi di terra,
ch’ ‘un fa nenti pi nuddu…
e lu menu,
Signuri,
pi Tia.

di Francesco Leone
_____

La poesia “Nna li notti sereni” si è classificata tra le finaliste della sezione delle poesie a tema libero in dialetto del Premio Nazionale di Letteratura e Poesia “Vincenzo Licata – Città di Sciacca”, Edizione 2009.

spacer

Leave a reply