Chi ven’addiri:
pridicari la paci, addisiari lu beni,
e poi
sciarriarisi cu lu primu chi veni.
Comu lu parrinu furbu e maliziusu
chi a lu prossimu pigghia pi fissa
e poi leggi lu vangelu duranti la missa.

Chi ven’addiri:
sbandierari la difesa di l’ambienti
e poi
ittari la munnizza fora li recipienti.
Comu lu fanaticu ambientalista
cu la casa a mari abusiva e in bella vista,
tantu dannusu e fanfaruni
chi scarica la fogna a lu Stazzuni.

Chi ven’addiri:
libertà e democrazia,
campari finalmente senza l’odiu,
e poi
fari la guerra a cu pusseri lu petroliu.
Comu l’Americani
chi s’ammintaru la guerra “preventiva”
pi trascinari lu munnu alla deriva.
Ma a li parlamentari e presidenti
nun ci nni futti propri unenti,
picchì a lu frunti
nun ci mannanu né figghi né parenti.

Eccu li falsi pridicatura!
Eccu l’egoismu:
lu cancru incarnatu chi avi l’omu.
Si nun guarisci di sta gravi malatia
porterà di sicuru lu munnu a la pazzia.

di Giuseppe Maniscalco
_____

La poesia “Li falsi pridicatura” si è classificata tra le finaliste della sezione delle poesie a tema libero in dialetto del Premio Nazionale di Letteratura e Poesia “Vincenzo Licata – Città di Sciacca”, Edizione 2009.