Din don don …
Din don don …

Sunava d’accussì lu “cicchenninu”
di stu paisi miu di marinari.
E l’ecu rispunnìa di lu gran mari,
di la marina nostra, ogni matinu.

“Fighiu” dicìa me’ matri, “attentu, attentu,
beddu cuntenti, vattìnni a la scola!”
E m’astutava ‘n-vucca la parola
cu na vasata soi, c’ancora sentu.

E mi nni jia a la scola, cutulinu,
mentri lu ventu a mari si sciarriava.
Sintìa lu “cicchenninu” chi sunava
ddu cantu, chi nun fu lu me’ distinu.

Din don don …
Din don don …

O scola, primavera di la vita,
priziusu scrignu di duci pinseri,
gran mari di di cosi cchiù sinceri,
spiranza luminusa ed infinita.

Suli di fidi e di maternu amuri,
di sacrifizi, di passioni ardenti,
tu sì l’eterna luci di li genti
pi liberalli di li lochi oscuri.

S’illumina a chiamarti, la parola,
tantu sì duci, tantu sì splinnenti.
Siddu ti pensu tu mi sì obbedienti …
E st’anima, assitata, si cunsola.

Amàriti è na cosa cilistiali
pirchì l’amuri toi nun ha cunfini;
tu mi dasti li rosi senza spini
bianca palumma, beni universali.

Fussi na regia tutta brillantata,
una casuzza spersa di campagna,
na cammaredda supra na muntagna,
un macasenu afflittu di cuntrata,

sì sempri Tu, jardinu binidittu,
paradisu di luci e di sapiri,
dunni l’omu canusci lu duviri
e, nni la libertà, lu sò dirittu.

Pi tutti di me’ jorna strati-strati
chi ti lassavi senza na parola,
ora ti cantu tutta, amata Scola,
di jorna pi mia su’ pugnalati,

cutiddati, rimorsi, pintimenti
chi ‘un cumprinnivi su to’ Granni Amuri …
Ed iu mi sentu sempri un piccaturi
chi t’annintuva tutti li mumenti;

pirchì nni lu to’ cori c’è na fiamma
ch’illumina la vita e dà l’Amuri!
Scola pìghiati tutti li me’ ciuri,
ddi ciuri chi si dunanu a la Mamma!

Din don don …
Din don don …

Ora ti cercu senza mai stancari,
ma l’ecu toi si persi ntra stu mari!

_____

Torna all’indice delle poesie………………..Torna all’indice della sezione dedicata a V. Licata