Accussì mi cuntaru e accussì cuntu.

A vinti mighia fora sta citati,
dunn’è chi vannu li palagaroti
una varcuzza avia ‘n-funnu calati
cincu carteddi cu li Capacioti;
Bertu Ammareddu, nostru piscaturi,
pinsavi a Tina, lu sò prim’amuri.

Prima di fari vela idda ci dissi:
“Tu parti pi ddà ffora e ccà mi lassi,
ma li me’ occhi a mari stannu fissi
tutti li voti chi di mia t’arrassi,

ti dugnu sta midaghia pi ricordu.
Iu ti prumettu chi giammai ti scordu.”

Supra la puppa, ripinsannu a Tina,
la bedda marinara sciacchitana,
Bertu tinia ‘n-mani la catina
cu la midaghia la jurnata sana.
Ma na matina va pi manuvrari
e la midaghia ci cadiu a mari.

Quannu s’ama cu cori pi daveru,
e si campa pi sta parola “Amuri”,
ogni putenti liggi vali zeru.
La stissa morti nun nni fa timuri.
Bertu Ammareddu allura si spughiau
e a testa ‘n-funnu a mari si jittau.

E scinniu, scinniu ‘n-funnu a lu mari,
‘n-mezzu li scoghi e li stiddi marini;
Misi tuttu lu funnu a sbutuliari
facennu spavintari li mmistini.
Poi, mentri assicutava un pisci gaddu,
ci vinni ‘n-mani un pezzu di curaddu.

Vosi assummari pi pighiari ciatu,
cu ddu tisoru di lu nostru mari.
E a bordu chi l’avianu p’annigatu,
quann’è chi si lu vitturu affacciari
gridaru tutti: “Si misi a cavaddu!
Bertu Ammareddu truvau lu curaddu!”

Ci fu na festa in tutta la marina,
e la nutizia si spargiu luntana.
S’armau la nova varca curallina,
la Sciacchitana e la Napulitana;
Turri di Grecu fici la Regina,
chi si jinchiu la varca sana-sana;
ma la midaghia di la bedda Tina
Ristau ‘n-funnu a la Sicca Sciacchitana.

_____

Torna all’indice delle poesie………………..Torna all’indice della sezione dedicata a V. Licata