Notti di luna china! Nta lu mari
ad una ad una caderu li stiddi
sentu a lu cori miu centu faiddi
e tra suspuri e la malincunia
iu m’addurmisciu… e ‘n-sonnu vegnu a tia.

Ninna nanna, dormi ciatu
è l’amuri chi mi manna:
cantu a tia sta ninna nanna
chi lu mari m’à nsignatu.
Centu favuli di mari
iu ti vogghiu raccuntari.

Nta un’isula spirduta di lu mari
Lina la bruna, ciuri d’isulana,
prumisi a lu so’ amuri d’aspittari
(un marinaru di terra luntana).
E tutti li nuttati idda guardau
lu mari, ma l’amuri nun turnau.

Ninna nanna, dormi ciatu
chista è favula di mari
iu ti vegnu a cunfirmari
la parola chi t’àiu datu.
E’ l’amuri chi mi manna
dormi, dormi, ninna nanna!

_____

Torna all’indice delle poesie………………..Torna all’indice della sezione dedicata a V. Licata