E si nun semu frati
Chi ccosa semu?
Pagghia
Senza nuddu culuri
Ca si lassa tinciri
A pprima jurnata di suli
E si nun semu frati
Chi ccosa semu?
Canali comu tetti di casi
‘Mpustati a unu a unu
Senza radichi
Ca o primu sciusciuni di ventu
Si scumponinu ‘tanti pizzuddicchia
Facennusi muddica.
E si nun semu frati
Chi ccosa semu?
Lampara di mari
C’aspettanu li pisci
Misi ‘ntunnu comu ‘na luna
Cumannata da tanti omini ?
E si nun semu frati
Chi ccosa semu?
E comu fazzu a diriccillu a l’autri
A fariccillu capiri
Ca quannu sugnu
Dintra a li quattru mura
Di ‘stu me’ cori
Ju nun mi sentu mai sula
Ca viu tanti facci
Granni e nichi di vecchi e picciriddi
Ca m’addumannanu amuri
E si nun semu frati
Chi ccosa semu?
Francesca Guajana
Palermo
La poesia “E si nun semu frati chi ccosa semu?” ha partecipato all’ edizione 2015 del Premio Letterario “Vincenzo Licata – Città di Sciacca”, classificandosi al TERZO POSTO della sezione “Poesia a tema libero in Vernacolo”.