A VINTI MIGGHIA FORA STA CITTATI
DUNN’è CHI VANNU LI PALANGAROTI
LI NOSTRI PISCATURA AVIANU CALATU
CINQU CATTEDDI CU LI CAPACIOTI

BETTU AMMAREDDU LU NOSTRU PISCATURI
PINZAVA A TINA, LU SO PRIMU AMURI

PRIMA DI ISARI VELA IDDA CI DISSI
TU PARTI PI DDA FORA E CA MI LASSI
MA LI ME OCCHI A MARI SUNNU FISSI
TUTTI LI VOTI CHI DI MIA T’ARRASSI

TI RUGNU STA MIDAGGHIA PI RICODDU
IU TI PRUMETTU CHI GIAMMAI TI SCODDU

SUPRA LA PUPPA RIPINZANNU A TINA
LA BEDDA MARINARA SCIACCHITANA
BETTU TINIA NMANU LA CATINA
CU DA MIDAGGHIA, NA JURNATA SANA

MA NA MATINA VA PI MANUVRARI
E LA MIDAGGHIA CI CARIU A MARI

QUANNU SI AMA CU CORI PI DAVERU
E SI CAMPA PI STA PAROLA “AMURI”
OGNI PUSSENTI LIGGI VALI ZERU
PURU LA MORTI NUN FA CCHIU TIRRURI

BETTU AMMAREDDU ALLURA SI SPUGGHIAU
E A TESTA NFUNNU A MARI SI ITTAU

SCINNIU, SCINNIU NFUNNU A LU MARI
MMEZZU LI SCOGGHI E LI STIDDI MARINI
MISI TUTTU LU FUNNU A SBUTULIARI
FACENNU SPAVINTARI LI MMISTINI

E MENTRI ASSICUTAVA UN PISCI CADDU
CI VINNI NMANI UN PEZZU RI CURADDU

VOSI ASSUMMARI PI PIGGHIARI CIATU
CU DU TESORU DI LU NOSTRU MARI
E A BORDU CHI L’AVIANU P’ANNIATU
QUANNU SI LU VITTIRU AFFACCIARI
GRIDARUNU TUTTI “SI MISI A CAVADDU”
“BETTU AMMAREDDU ATTRUVAU LU CURADDU”

CI FU NA FESTA NTUTTA LA MARINA
E LA NOTIZIA SI SPARGIU LUNTANA
S’ARMAU LA NOVA VARCA CURALLINA
LA SCIACCHITANA E LA NAPULITANA

TURRI DI LU GRECU FICI LA RIGINA
CHI LA VARCA SI LA INCHIU SANA SANA
MA LA MIRAGGHIA DI LA BEDDA TINA
RISTAU NFUNNU A LA SICCA SCIACCHITANA

_____

Torna all’indice delle poesie………………..Torna all’indice della sezione dedicata a V. Licata