LA CURSA DI LI SCECCHI

Largu picciotti, largu e stamu attenti
a qualchi piratuna nta la panza!
“Appuntatu, ammuttassi cu’ creanza!”
“Stai fermo lì, e senza diri niente!”
“Perciò accussì s’ammutta?” “Cosa vuoi?”
“Signuri mei, cu’ mori a cuntu soi!

Siddu li scecchi avissiru a quaciàri,
lu Sinnacu s’a senti scutuliari!”

Cincu scecchi nvicchiuti e sfasulati,
chi pi cumminazioni stannu ‘n-peri,
cu l’ossa nta li…spaddi e sdiciancati,
portanu ‘n-gruppa cincu cavalieri
armati a tuttu puntu di furcuna.
Lu cumitatu lu signali duna.

Na scarrica di centu vastunati
rcivinu li scecchi nta lu schino.
Li picciotti, chi sunnu interessati
e chi a la cursa sunnu cchiù vicinu,
nta li panzi cafuddanu pirati
pi mettiri scecchi allineati.

Partinu st’animali svinturati
senza mancu sapiri unn’hannu a jiri
picchi li genti, misi nta li lati
cu li vuci li fannu nzalaniri.
Un fausu sceccu cu na cauciata
Jetta lu cavalieri strata-strata.

Frischi, ammuttuna, vuci e carcagnati,
corpi di lignu, botti nta la testa,
li scecchi finalmente su’ arrivati
Lu…vitturiusu porta nta la testa
Na scocca russa e n’atra tricculuri
chi lu dichiara prima primu vincitori.

St’armalu vitturiusu, a mia mi pari
comu a ddi certi scecchi gnurantuna,
chi lu diploma pottiru acchiappari
a via di furcunati e d’ammuttuna.

_____

Torna all’indice delle poesie………………..Torna all’indice della sezione dedicata a V. Licata

Leave a reply