Haiu un cappidduzzu
beddu, sapuritu,
quannu mi l’haiu a mettivi,
quannu mifazzu zitu.
Scinnu pi lu Cassaru
acchianu pi Panneri,
tutti chi mi salutanu
bongiornu,Cavaleri!* )
Lu sentu ancora ‘u cantu di me matri
mentri lavava i piatti ‘nt’a cucina
e l’alligria arrivava ‘nsinu a nuatri
ca criscevamu a pani e lattuchina.
Ed iu m’immaginava di passiari
cu ‘stu cappeddu ‘nsirragghiatu ‘n testa,
ca ‘un ci vinissi ‘u sfiziu di vulari
comu aceddu, arrubbannumi la festa.
Quantu a farimi zitu ‘un ci pinsava,
però già mi piacia na picciridda
d’ott’anni comu a mia ca s’annacava
ed iu, alluccutu, stavu appressu a idda.
Comu passaru sissant’anni e rrutti?
Quannu finiu l’età di la ‘nnuccenza?
Prima ca ‘a terra nni cummogghia a tutti,
si, mi piacissi riincuntrari a Enza.
Ma no china di rughi e di duluri,
arripudduta e stramma comu a mia,
ma profumata e bedda comu un ciuri.
E appressu.. .un picciriddu ca ‘a talìa.
*fìlastrocca popolare siciliana.Cassaru – (dall’arabo al-qasr) è la più antica via di Palermo, oggi corso Vitt. Emanuele. Panneri- via Pannieri, collega corso V. Emanuele conp.za Caracciolo, sede del mercato “Vucciria”.
Santi Cardella
Palermo
La poesia “Doppu ‘a guerra” ha partecipato all’ edizione 2015 del Premio Letterario “Vincenzo Licata – Città di Sciacca”, classificandosi al SECONDO POSTO della sezione “Poesia a tema libero in Vernacolo”.
